1124

«Білі галавой аб сцяну і падлогу, лыжкай расціскалі зубы»: затрыманы рэдактар «Рэальнага Брэста»

29.03.2017 Крыніца: "Наша Ніва"

У аўторак Ленінскім РАУС Брэсцкага аблвыканкама быў затрыманы індывідуальны прадпрымальнік, рэдактар партала «Рэальны Брэст» Дзяніс Марук. Дзяніс рабіў рэпартажы з маніфестацый «недармаедаў». На адной з акцый ён паказаў сярэдні палец чалавеку ў цывільным, які здымаў яго на камеру.

Дзяніс Марук

«Мне свецяць «суткі» за непрыстойны жэст на адрас супрацоўніка міліцыі, — расказаў «Нашай Ніве» Марук. — Але пачакайце, які ж ён супрацоўнік міліцыі, калі ён быў без знакаў адрозненняў?»

Дзяніс быў не згодны з выстаўленым яму абвінавачваннем, якое патрабавалі падпісаць. Пасля гэтага, сцвярджае ён, яго пачалі жорстка збіваць.

«Каб захаваць свае відэаматэрыялы я засунуў флэшку ў рот. Мяне пачалі біць яшчэ больш жорстка, аб падлогу, па нагах, па нырках. Засунулі нейкую брудную лыжку ў рот, спрабуючы выцягнуць флэшку, парвалі ўсю вопратку».

Толькі калі ў кабінет зайшоў нехта з начальства, з рэдактарам партала пачалі размаўляць спакойным тонам, расказаў Марук «Нашай Ніве».

«Мне сказалі, што на першы раз мяне даруюць і выпісалі штраф: дзве базавыя велічыні за дробнае хуліганства. Аднак я не збіраюся пакідаць гэта проста так. Цяпер буду здымаць пабоі. Я не аспрэчваў тое, што паказаў чалавеку ў цывільным сярэдні палец. Але за што ж збіваць мяне?» — абураецца ён.

У той жа час у Ленінскім РАУС Брэста «Нашай Ніве» паведамілі, што да іх такі грамадзянін не паступаў.

Самыя важныя навіны і матэрыялы ў нашым Тэлеграм-канале — падпісвайцеся!