Журналіста Рамана Папкова, якога Следчы камітэт Расіі лічыць датычным да забойства «ваенкара» Уладлена Татарскага, звольнілі з выдання «Вот так» неўзабаве пасля тэракта ў Санкт-Пецярбургу. Пра гэта паведамляе RTVI са спасылкай на намесніка кіраўніка тэлеканала «Белсат» Аляксея Дзікавіцкага. «Вот так» — праект польскага тэлеканала «Белсата», створанага для беларусаў, піша «Наша Ніва».
«Актывісты, якія займаюцца падтрымкай палітычных партый, не могуць адначасова быць журналістамі, прынамсі ў нас», — сказаў Дзікавіцкі.
Паводле яго слоў, палітычная партыя, да якой мае дачыненне Папкоў, — гэта рух былога дэпутата Дзярждумы Іллі Панамарова «Съезд народных депутатов», якое ў Расіі аб'явілі «непажаданай» арганізацыяй.
RTVI адзначае, што апошняя публікацыя за аўтарствам Папкова на сайце «Вот так» была зробленая 3 красавіка — на наступны дзень пасля тэракта ў Пецярбургу. У ёй журналіст адмаўляе дачыненне да выбуху і кажа, што камунікаваў з абвінавачанай у тэракце Дар'яй Трэпавай выключна «пра журналісцкія справы».
«Зразумела, ніякіх загадаў забіваць Татарскага, ніякіх знаёмстваў з украінскай разведкай — нічога гэтага не было», — казаў Папкоў.
1 чэрвеня МУС Расіі аб'явіла Папкова ў вышук. Следчы камітэт завочна выставіў абвінавачанне Папкову па артыкуле аб арганізацыі тэракта. СК сцвярджае, што ён «кіраваў» тэрактам, у выніку якога загінуў Татарскі.
Чытайце яшчэ:
«Для іх падзеі ў нашым рэгіёне — гэта канфлікт Расіі з краінамі-спадарожнікамі». Беларускі журналіст пра наведванне Паўднёвай Карэі
У ШЫЗА адна дзяржаўная мова. Фрагмэнты кнігі Алега Грузьдзіловіча
«Размаўляць на роднай мове, каб будаваць "лінгвістычныя межы"». Эксперты абмеркавалі, як расійская агрэсія змяняе постсавецкую прастору