158 0

Бабруйск стаіць за незалежную журналістыку

05.11.2018 Крыніца: Служба маніторынгу ГА "Беларуская асацыяцыя журналістаў"

5 лістапада бабруйскія журналісты сабраліся, каб падтрымаць міжнародную акцыю “Станем за журналістыку” і выказаць салідарнасць з калегамі, якіх пераследуюць за іх прафесійную дзейнасць.

Бабруйскія журналісты падчас сустрэчы паразмаўлялі пра незалежную журналістыку і далучыліся да флешмобу з адмысловымі карцінкамі.

– Менавіта дзякуючы незалежным журналістам асвятляюцца ўсе самыя вострыя праблемы і паказваюцца хібы грамадства, гэта дазваляе людзям убачыць, што адбываецца насамрэч у краіне, – разважае журналіст, сябра ГА “БАЖ” Яўген Васьковіч. – Але падчас працы трэба ўлічваць, у якой мы краіне, таму журналістам у нашых умовах ніколі не трэба забывацца пра асцярожнасць.

img_20181105_161001_765.jpg

– Мы стаім за незалежную журналістыку, мы прызвычаіліся да гэтага словаспалучэння, але асабіста для мяне яно дзіўна гучыць, бо як можна дзяліць журналістыку на залежную і незалежную? – сказаў журналіст з Бабруйска Дзяніс Носаў. – Журналістыка апрыёры – незалежная, калі яна сапраўды журналістыка, а не прапаганда.

img_20181105_164030_501.jpg

– Я лічу, што важна і трэба стаяць за журналістыку, як і ўвогуле быць нам усім, журналістам, салідарнымі, – зазначае журналістка, сябра ГА “БАЖ” Алеся Лацінская. – Як паказваюць апошнія падзеі, ад пераследу з боку дзяржавы ніхто сёння не застрахаваны, нават такія буйныя СМІ, як БелаПАН і TUT.BY. Гэта можа адбыцца з любым і ў любы дзень, і таму нам так важна стаяць адзін за аднаго.

img_20181105_164026_583.jpg

Кампанія “Станем за журналістыку” праводзіцца кожны год. Асноўная мэта сёлетняй акцыі – падтрымаць журналістаў, якія пацярпелі ў сувязі з так званай “справай БелТА”.

Каментары