882

Анемпандыстаў завітаў ў Гродна з “Колерам Беларусі”

03.05.2017 Крыніца: Служба маніторынгу ГА "Беларуская асацыяцыя журналістаў"

У гродзенскім цэнтры гарадскога жыцця адчынілася выстава дызайнера, мастака Міхала Анемпадыстава "Колер Беларусі". Аўтар “Народнага альбома” прадставіў на сценах былой галерэі “Крыга” больш за паўсотні сваіх фотапрацаў, на якіх паказаныя розныя мясціны Беларусі.

"Гэта частка праекта, невялікая частка ілюстрацый, якія ўвойдуць у альбом “Колер Беларусі”. Здымкі адразу друкавалі ў вялікім фармаце і мы мелі наўвазе, што будзем паказваць гэта ў фармаце выставы, — распавёў Міхал Анемпандыстаў. — Я прыйшоў да высновы, што колькі разоў ні прыяджаў у Гродна, то прыходзяць людзі іншыя, новыя. Мне важна, каб прыйшлі людзі, якім цікава. І калі гэтыя людзі прыйшлі з цікаўнасцю слухаць, то я мяркую, што мэта выкананая".

Гродзенскі журналіст Павел Мажэйка мяркуе, што такая выстава павінна падабацца кожнаму наведніку:

"Тое, што вынайшаў, даследваў Міхал — гэта напраўду нейкі “беларускі космас”. Я гляджу на ўсе гэтыя ўсе выявы — уражвае мяне такая рэч, што нішто не раздражняе. То бок ўсе беларускія колеры, якія Міхал знайшоў на тэрыторыі этнічнага пражывання беларусаў, — гэта тое, што цешыць маё вока, радуе маё вока. І сапраўды неверагоднае пачуццё і ў мяне ёсць уражанне і разуменне таго, што фактычна ўсе наведнікі гэтай выставы падзяляюць гэтае мяркаванне".

Міхал Анемпандыстаў правёў па сваіх працах імправізаваную экcкурсію, якая цягнулася амаль дзве гадзіны і кожны з наведнікаў меў магчымасць задаць аўтару пытанне.

Выставу “Колер Беларусі” можна пабачыць ў гродзенскім цэнтры гарадскога жыцця цягам бліжэйшых двух тыдняў.

Фота Аляксандра Саенкі і Андрэя Мялешкі

 

 

Самыя важныя навіны і матэрыялы ў нашым Тэлеграм-канале — падпісвайцеся!