535

Абвешчаны збор грошай на пакрыццё штрафаў віцебскай блогеркі

18.02.2020 Крыніца: Служба маніторынгу ГА "Беларуская асацыяцыя журналістаў"

Блогерка Алена Янушкоўская стала “рэкардсменкай” па грашовых спагнаннях “за заклікі” ў сацыяльных сетках да ўдзелу ў акцыях падтрымкі незалежнасці, а таксама за ўдзел у іх. Яе прызналі вінаватай у парушэнні заканадаўства аб масавых мерапрыемствах паводле артыкула 23.34 КаАП.

Калі аршанскі блогер Шэры Кот быў пакараны найбольшай колькасцю “сутак”, то на стваральніцу відэаблога “Сапраўдная Беларусь” Алену Янушкоўскую накладзена пяць адміністрацыйных штрафаў, іх сума складае амаль 4 тысячы рублёў. Сплаціць такія грошы без падтрымкі грамадскасці блогерка не мае магчымасці.

“Аднойчы я зняла ролік, у якім запрасіла Аляксандра Лукашэнку прыехаць і паглядзець, як жывуць вясковыя людзі. Візіт, вядома ж, не адбыўся. Але я працягваю распавядаць беларусам пра рэальнае жыццё, і не толькі ў YouTube, але і ў групах "Сапраўдная Беларусь" у Facebook, “Одноклассниках” і “Вконтакте”. Я выхавала шасцярых (з іх пяцёра прыёмных) дзяцей, у мяне пяцёра ўнукаў, і я не абыякавая да жыцця нашай краіны. І за гэта мяне асудзілі на 145 базавых велічынь”, — піша Алена Янушкоўская на платформе для збору  ахвяраванняў.

3915 рублёў — гэта яшчэ не канчатковая сума штрафаў. 18 лютага блогерку зноўку будуць судзіць: яе выклікалі ў суд Віцебскага раёна за заклікі на акцыю ў падтрымку суверынітэту Беларусі, якая адбылася 29 снежня мінулага года ў Віцебску.

Самыя важныя навіны і матэрыялы ў нашым Тэлеграм-канале — падпісвайцеся!