1336

80-гадовага мінчука паўторна звінавацілі ў знявазе прэзідэнта і прадпісалі прымусовае лекаванне

12.07.2016 Крыніца: Прэс-служба ГА "Беларуская асацыяцыя журналістаў" Сюжэт: Дыфамацыя

12 ліпеня суд Фрунзенскага раёна г. Мінска (суддзя Аляксандр Лукашэвіч) прызнаў пенсіянера Аляксандра Лапіцкага асобай, што здзейсніла грамадска небяспечны ўчынак паводле некалькіх артыкулаў крымінальнага кодэксу аб абразе. Разам з тым, яго вызваляюць ад адказнасці – бо ён, паводле суда, не аддаваў сабе справаздачы ў зробленым – і адпраўляюць на прымусовае лекаванне.

Гэта паўторнае рашэнне суда па справе Лапіцкага. У першы раз аналагічную пастанову вынесла 12 красавіка г.г. суддзя Фрунзенскага райсуда Юлія Блізнюк. Лапіцкі падаў касацыйную скаргу на гэтае рашэнне, і 3 чэрвеня Мінскі гарадскі суд яе задаволіў, адправіўшы справу на новы разгляд.  

Крымінальную справу ў дачыненні да Лапіцкага ўзбудзілі па артыкулах 391, 368 і 369 Крымінальнага кодэкса (“Абраза суддзі альбо народнага засядальніка”, “Абраза прадстаўніка ўлады”, “Абраза Прэзідэнта Рэспублікі Беларусь”). Яго віна заключалася ў тым, што на працягу апошніх гадоў ён нібыта рассылаў са сваёй электроннай скрыні ў розныя органы дзяржаўнай улады паведамленні з абразамі.

Паводле Алега Волчака, кіраўніка арганізацыі “Прававая дапамога насельніцтву” (Україна), у якасці зняважаных у справе фігуруюць некалькі суддзяў Мінскага гарадскога суда, Фрунзенскага раённага суда, супрацоўнікаў пракуратуры г. Мінска, Генеральнай пракуратуры і ўласна кіраўнік дзяржавы.

Правабаронцы і адвакат будуць рыхтаваць прыватную скаргу ў Мінгарсуд, які павінен цягам месяца разгледзець яе. Калі ён палічыць рашэнне законным, яно ўступіць у законную сілу, і тады міліцыя можа прымусова даставіць Лапіцкага ў рэспубліканскі псіхіятрычны шпіталь у Навінках.

“Там яго будуць лекаваць пад наглядам урачоў, хаця адвакат слушна заўважыў: чалавек сам прыходзіць, кантактуе з прэсай, з людзьмі – у чым яго “грамадская небяспека”? Там жа яго не проста кладуць у шпіталь, а будуць даваць медпрэпараты, якія могуць уплываць на галаўны мозг”, – падкрэсліў Алег Волчак у гутарцы з прэс-службай ГА “БАЖ”.  

“Рашэнне пра прымусовую шпіталізацыю Аляксандра Лапіцкага варта прымаць, зыходзячы выключна з меркаванняў бяспекі грамадзян і самога Аляксандра Лапіцкага, а пры адсутнасці такіх пагрозаў – не замахвацца на яго асабістую свабоду”, – заяўлялі пасля першага суда над Лапіцкім прадстаўнікі закрытага ўладамі Праваабарончага цэнтра “Вясна”.