437

20 снежня ў Гродне затрымалі журналістак

20.12.2020 Крыніца: Служба маніторынгу ГА "Беларуская асацыяцыя журналістаў"

У самым цэнтры Гродна 20 снежня была затрыманыя: журналістка інфармацыйнага агенцтва БелаПАН Марына Харэвіч і журналістка газеты «Наша cлова» і выдання Hrodna.Life Алена Кавальчук.

Байцы гродзенскага АМАП / Фота: tut.by

У памяшканне на вуліцы Савецкай, дзе яны працавалі над журналісцкімі матэрыяламі, спрабавалі патрапіць супрацоўнікі праваахоўных органаў у цывільным. Міліцыянты пагражалі, што ўзламаюць дзверы.

Да гэтых супрацоўнікаў праз некаторы час далучыліся байцы АМАПа УУС Гродзенскага аблвыканкама на чале з камандзірам атрада Віктарам Краўцэвічам.

Як паведаміла Марына Харэвіч карэспандэнту службы маніторынгу ГА «БАЖ», міліцыянтам у выніку ўдалося ўвайсці ў памяшканне. Пасля гутаркі і высвятлення пытанняў, звязаных з ажыццяўленнем журналісцкай дзейнасці, Харэвіч і Кавальчук вывелі на вуліцу.

Спачатку супрацоўнікі міліцыі збіраліся пасадзіць іх у службовы аўтатранпарт і адвезці у РАУС, але пасля праверкі дакументаў і пацвярджэння статусу журналістак адпусцілі.

У гэты дзень па ўсёй Беларусі праводзіліся анансаваныя раней акцыі пратэсту. Паводле праваабарончага цэнтра «Вясна» станам на вечар 20 снежня ў Гродне сілавікі затрымалі не менш за 11 чалавек.

Самыя важныя навіны і матэрыялы ў нашым Тэлеграм-канале — падпісвайцеся!