У Беластоку 16 студзеня ў 18.00 каля беларускага консульства адбудзецца акцыя салідарнасці з журналістам, актывістам польскай меншасці ў Беларусі Анджэем Пачобутам. Пікет прымеркаваны да пачатку суда над палітзняволеным журналістам, што мусіць распачацца ў гэты дзень у Гродзенскім абласным судзе.
“Акцыю арганізуюць Падлясскае аддзяленне Таварыства Wspólnota Polska і актывісты незалежнага Саюза палякаў Беларусі. Гэтыя арганізацыі на працягу доўгага часу арганізуюць штомесячныя акцыі салідарнасці з Анджэем у Беластоку. Новай акцыяй яны хочуць выказаць сваё стаўленне да сітуацыі з яго зняволеннем і выказаць падтрымку Анджэю і тысячам іншых палітвязняў, якія знаходзяцца за кратамі ў Беларусі”, — кажа ў каментары службе маніторынгу БАЖ журналіст-фрылансер Ян Роман.
Паводле яго слоў, ужо вядома, што плануюць прысутнічаць дэпутат польскага сейма Роберт Тышкевіч, беларускія праваабаронцы, калегі і знаёмыя Анджэя, якім ёсць што сказаць пра тое, што зараз адбываецца ў Беларусі. Запрашэнне на акцыю дасланае ў гарадскую адміністрацыю.
Анджэй Пачобут знаходзіцца пад вартай з 25 сакавіка 2021 года. Яго абвінавачваюць у “распальванні варожасці”, “рэабілітацыі нацызму”, а таксама ў закліках да санкцый. У кастрычніку 2022 года КДБ унёс журналіста ў “спіс тэрарыстаў”.
Анджэю некалькі разоў прапаноўвалі пісаць прашэнне аб памілаванні на імя Лукашэнкі, але ён адмовіўся. Цяпер журналіста ўтрымліваюць у СІЗА гродзенскай турмы №1. Паводле высунутых абвінавачанняў яму пагражае да 12 гадоў пазбаўлення волі.
Чытайце яшчэ:
Президент “Радио Свобода” Джейми Флай: “Мы вернемся в Минск и снова откроем там бюро. Это вопрос времени”
TUT.BY: как появилось и как было разгромлено главное медиа в Беларуси
Дзіцячы часопіс «Матуліна сонейка» вярнуўся да чытачоў