671

Затрымалі ў салоне прыгажосці, усю камеру адправілі ў карцар. Журналістка Глафіра Жук распавяла пра 30 сутак на Акрэсціна

28.06.2021 Крыніца: Наша Ніва

Журналістка «Народнай волі» Глафіра Жук выйшла з Акрэсціна пасля 30 сутак. За гэты месяц яе ні разу не звадзілі ў душ, толькі раз на шпацыр і два дні пратрымалі ў карцары. Пра сваё знаходжанне ў ізалятары дзяўчына распавяла «Нашай Ніве».

Глафіру затрымалі 29 мая ў салоне прыгажосці.

«Я прыйшла рабіць манікюр. Мне папшыкалі рукі антысептыкам, майстар узяла інструмент, і тут заходзяць тры мужчыны, паказваюць адміністратару пасведчанні. І я ўжо разумею, што гэта, напэўна, за мной. Падыходзяць да мяне: «Глафіра Дзмітрыеўна? Вы затрыманы, падазраяцеся ва ўдзеле ў масавым мерапрыемстве». Я спытала, чаму не затрымалі дома (я цэлы дзень была там), каб мне адзенне ўзяць з сабой, бо я ў адной кашулі. Яны кажуць: так нецікава».

За два тыдні дагэтуль дзяўчына асвятляла суд па справе студэнтаў і ў сацыяльных сетках апублікавала фота натоўпу пад будынкам суда і сваіх кедаў, пасля таго як уцякала падчас разгону. Суд палічыў гэта доказам пікету і прызначыў суткі. 

На Акрэсціна Глафіра сустрэла сваё 20-годдзе.

«У нас была бутэлька мінералкі, дзяўчаты захавалі з нейкага перыяду, і ў дзень народзінаў яны адкрылі яе мне, як шампанскае, і разлілі ў жалезныя кубачкі. У абед чокаліся кампотам», — апісвае яна, як адзначала свята.

За месяц журналістку ні разу не вадзілі ў душ і толькі аднойчы на шпацыр. У той дзень тэмпература была больш за 30 градусаў і дзяўчатам дазволілі на 20-30 хвілін пахадзіць у дворыку.

Глафіра расказвае, як яны ратаваліся ад спёкі:

«Там камера назірання, але нам было ўсё роўна, мы распрануліся да бялізны, бо было немагчыма трываць, і халоднай вадой абліваліся. Набіралі яе ў бутэлькі і да сябе прыстаўлялі. Пілі шмат вады з-пад крана».

Перадачы дзяўчыне аддалі на выхадзе. Камеры, дзе яна знаходзілася, увесь час былі перапоўненыя.

«Я прыйшла спачатку ў двухмесную камеру, там было чалавек 13 прыкладна. Пасля нас перавялі ў чатырохмесную, бо нас стала больш — чалавек 15. Потым частку этапавалі на Баранавічы, і нас — 7 чалавек — зноў засунулі ў двухмесную. Калі людзі сталі прыходзіць і нас стала 14, перавялі ў чатырохмесную».

Двое сутак Глафіра правяла ў карцары. Падчас абеду да іх прыйшлі з праверкай, адзін з супрацоўнікаў пачаў аглядаць посуд. На талерцы і кубачку ён знайшоў нацарапаныя надпісы і сказаў, што іх зрабілі дзяўчаты і адкажуць за гэта. За паўгадзіны да адбою ўсю камеру (7 чалавек) адправілі ў карцар. 

Сярод суседак Глафіры за гэты час былі прадстаўніцы розных прафесій — галоўныя бухгалтары, археолаг, студэнткі, кантралёр, выхавацелька дзіцячага садка.

Сама дзяўчына паралельна з працай вучыцца ў Інстытуце журналістыкі БДУ на 3 курсе.

«Сёння ўжо буду адпачываць, а заўтра планую пайсці даведацца, адлічылі мяне ці не. Усю сесію я адседзела, ні на водны экзамен не патрапіла», — кажа журналістка.

Самыя важныя навіны і матэрыялы ў нашым Тэлеграм-канале — падпісвайцеся!