415

Працаваў у канцылярыі прэзыдэнта, кіраваў БелТА і СТВ. Хто такі Ігар Луцкі, якога прызначылі міністрам інфармацыі

08.06.2020 Крыніца: Svaboda.org

Новы міністар інфармацыі паабяцаў «бараніць насельніцтва ад інфармацыі, якая наносіць шкоду дзяржаве». Свабода прагледзела біяграфію Ігара Луцкага.

Скончыў унівэрсытэт, калі Лукашэнка стаў прэзыдэнтам

Ігар Луцкі — адносна малады чыноўнік, яму 48 гадоў. Ураджэнец Століншчыны, скончыў БДУ ў 1994 годзе, калі Лукашэнка абраўся прэзыдэнтам на першы тэрмін. У 2000 годзе Ігар Луцкі скончыў Акадэмію кіраваньня пры прэзыдэнце.

Адразу пасьля ўнівэрсытэту ён стаў дзяржаўным службоўцам, працаваў у Міністэрстве па кіраваньні дзяржаўнай маёмасьцю і прыватызацыі начальнікам аддзелу праектаваньня і базаў дадзеных.

 

Быў кіраўніком у БелТА і СТВ

З 2000 па 2004 год Ігар Луцкі пасьпявае папрацаваць у канцылярыі прэзыдэнта і ў апараце рады фэдэрацыі прафсаюзаў. А далей пачынаецца ягоная мэдыйная кар’ера. З 2004 году ён ужо намесьнік кіраўніка БелТА, пасьля — дырэктар «Новага радыё», якое рабіла Фэдэрацыя прафсаюзаў, затым першы намесьнік гендырэктара БелТА, намесьнік міністра інфармацыі і гэндырэктар тэлеканалу СТВ. На апошняй пасадзе ён працаваў да прызначэньня міністрам.

 

Пры ім СТВ атрымаў «срэбную кнопку» на youtube

Калі Ігар Луцкі ўзначаліў СТВ, на youtube у канала было 30 тысяч падпісчыкаў. Гэта было ў 2018 годзе. У 2019 годзе, дасягнуўшы лічбы 100 тысяч падпісчыкаў, тэлеканал атрымаў «срэбную кнопку». Цяпер на канал падпісаныя 380 тысяч.

Частка кантэнту на СТВ — гэта прадукцыя расейскіх RenTV і СТС. Ігар Луцкі дбаў, каб уласнага кантэнту на тэлеканале было больш.

«Доля беларускіх праграм павінна павялічыцца. Але важна мець новыя твары і новы зьмест і напаўненьне», — казаў Ігар Луцкі ў 2018 годзе, калі яго прызначалі на СТВ.

Глядзім праграму тэлеканалу на 8 чэрвеня. З 26 перадач у тэлепраграме СТВ 14 — гэта беларускія праграмы, рэшта — расейская прадукцыя.

 

«Навучыўся працаваць у інтэрнэце»

Падчас прызначэньня Ігара Луцкага Лукашэнка выказаўся пра новага кіраўніка міністэрства і пахваліў яго за «працу ў інтэрнэце».

«Ведаю, што за гэты час (і прэс-сакратар мяне інфармавала) СТВ стала іншым, малайчына. Ты навучыўся працаваць у інтэрнэце. Думаю, што нам прыйдзецца з тваёй падачы перш за ўсё перафарматаваць працу Міністэрства інфармацыі. Мы ня бачым гэтага міністэрства, мы яго ня бачым. Хацелася б, каб мы яго ўбачылі. Я думаю, ён справіцца. Малады, сымпатычны чалавек. Вельмі прэзэнтабэльны. Людзі ўспрымуць яго добра», — сказаў Лукашэнка.

 

Анансаваў «закручваньне гаек»

Малады міністар адразу ж пасьля прызначэньня расказаў пра свае пляны. Аказалася, ён зьбіраецца ня столькі распаўсюджваць інфармацыю, колькі абмяжоўваць.

«Стратэгія Міністэрства інфармацыі, на мой погляд, будзе заключацца ў тым, каб карэктаваць дзеяньні сродкаў масавай інфармацыі, для таго каб забясьпечыць, па-першае, давядзеньне выразнай дзяржаўнай палітыкі і абмежаваць насельніцтва ад інфармацыі, якая наносіць шкоду дзяржаве», — сказаў Луцкі ў інтэрвію тэлеканалу СТВ у нядзелю, 7 чэрвеня.

«Мы бачым, што ўжо цяпер, у пэрыяд важнай палітычнай кампаніі, адбываецца ў сетцы Інтэрнэт, у сацыяльных сетках, на старонках сайтаў, на відэагостынгу. Можа камусьці здацца, што гэта нешта бяскрыўднае, але гэта вельмі сур’ёзна ўплывае на тое, што адбываецца ў краіне і тое, як будзе разьвівацца краіна», — заўважыў ён.

Самыя важныя навіны і матэрыялы ў нашым Тэлеграм-канале — падпісвайцеся!