Tarantino: «На фатографе нельга эканоміць»

Фотавыстава «Зваротны бок зорак» Аляксандра Ждановіча (Tarantino), пачала працу 10 сакавіка ў сталічным кінатэатры «Перамога».

На выставе прадстаўленыя фотаздымкі гуртоў «Ляпис Трубецкой», «Нейра Дзюбель», «Крама», «Без Билета», «The Toobes», «Детидетей», «Серебряная Свадьба», «Разбітае Сэрца Пацана», «Крамбамбуля» ды шмат якіх іншых.

У размове з карэспандэнтам прэс-службы БАЖ Аляксандр прызнаўся, што яго «фотазацікаўленні» не абмяжоўваюцца канцэртамі.

Па словах фатографа, любая газета ці Інтэрнет-выданне сёння будуць непаўнавартаснымі без фотаздымкаў. Таму ён упэўнены, што без працы людзі яго прафесіі не застануцца.  

Але на фатографе нельга эканоміць, — перакананы Аляксандр Ждановіч.
«Чалавек, які якасна робіць сваю працу, павінен займацца толькі ёй, і тады гэта будзе сапраўды класна».

Між тым, сёння эканомяць усе і на ўсім, і тое, што большасць яго калег, як і ён сам, працуюць фрылансерамі, — сітуацыя вымушаная. «Калі параўнаць заробак фотаграфа ў большасці выданняў і кошты на фотатэхніку, то бачна, што гэта несупастаўляльныя лічбы. Таму фатографу даводзіцца працаваць адразу ў некалькіх накірунках: і здымаць вяселлі, і нейкія партфоліо рабіць дзяўчатам, і ў той жа час хадзіць на працу. Так паціху і зарабляеш сабе імя», — кажа Tarantino.

Адкрыццё выставы сабрала шмат гасцей — калег-фатографаў, журналістаў, музыкантаў. Было шмат шчырых віншаванняў з першай выставай, пажаднняў плённай працы, а таксама жывая музыка ад «Крамы».

Арганізатарам выставы выступіла кампанія «Будзьма беларусамі!». Паглядзець здымкі можна будзе да 25 сакавіка.

Comments