Год з новым законам «Аб сродках масавай інфармацыі» (ФОТА, ДАДАЛОСЯ ВІДЭА)

«Улады па-ранейшаму імкнуцца захаваць кантроль над інфармацыйнай прасторай Беларусі. Пазітыўныя змены ў сферы СМІ, якія назіраліся ў канцы 2008 г. — пачатку 2009 г., не мелі сістэмнага і незваротнага характару, што пацвярджае далейшае пагаршэнне сітуацыі. Прававая база існавання СМІ ў Беларусі пасля прыняцця закона і шэрагу іншых нарматыўна-прававых актаў у сферы СМІ пагоршылася…»

Такія галоўныя высновы справаздачы БАЖ «Год з новым законам «Аб СМІ», якую прэзентаваў намеснік старшыні БАЖ Андрэй Бастунец на адмысловай прэс-канферэнцыі 8 лютага ў Мінску. (Поўны тэкст справаздачы можна знайсці на нашым сайце ў раздзеле «Маніторынгі».)

На фота (справа налева): Жанна Літвіна, Андрэй Бастунец, Андрэй Аляксандраў

У справаздачы сцісла пералічваюцца ўсе факты, што прывялі экспертаў да вышэйзгаданых высноваў: увядзенне нарматыўнага рэгулявання дзейнасці ў Інтэрнеце; папярэджанні СМІ ад Мінінфармацыі, органаў пракуратуры і КДБ; перашкоды ў прафесійнай дзейнасці журналістаў, у тым ліку замежных СМІ; цяжкасці пры рэгістрацыі новых выданняў і іншае.

Сёння ж, паводле закона «Аб СМІ», сканчаецца перарэгістрацыя ўсіх зарэгістраваных у Беларусі СМІ. Як паведаміў сёння прэс-службе БАЖ Віктар Гурэцкі, кіраўнік сектару рэгістрацыі СМІ і кантролю за выкананнем заканадаўства Міністэрства інфармацыі, 8 лютага дакументы на перарэгістрацыю яшчэ прымаліся, і на падсумаванне вынікаў спатрэбіцца яшчэ як мінімум тры дні.

Зрэшты, як адзначылі арганізатары прэс-канферэнцыі, гадавіна закона «Аб СМІ» была толькі адной з нагодаў для сустрэчы з калегамі. За апошні час адбылося багата іншых падзеяў, якія ўзрушылі журналісцкую супольнасць.

На прэс-канферэнцыі прысутнічаў афіцыйны прадстаўнік тэлеканала «Белсат» у Беларусі Міхась Янчук, у кватэру якога 3 лютага сілай спрабавалі ўвайсці супрацоўнікі міліцыі і каля якой у той жа дзень затрымалі журналіста Івана Шульгу.

Сп. Янчук падзякаваў усім калегам, якія аператыўна прыехалі ў той дзень на месца падзеяў і тым самым, на яго думку, прадухілілі затрыманне журналістаў, што знаходзіліся ў кватэры, і яго асабіста.

8 лютага Івану, які ўтрымліваецца ў ізалятары на Акрэсціна, перадалі чарговае «прывітанне» з волі. Міхаісь Янчук заклікаў журналстаў і ўсіх неабыякавых асобаў актыўней падтрымліваць Івана ў пастарунку — напрыклад, дасылаць яму лісты падтрымкі на 1-ы завулак Акрэсціна, 36 у Мінску (паштовы індэкс 220089).

Жанна Літвіна назвала затрыманне Івана Шульгі «хамскім выпадкам». Па яе назіраннях, гэтая падзея не атрымала дастаткова шырокага адлюстравання ў беларускіх СМІ, і таму старшыня БАЖ заклікала калегаў надаваць больш увагі гэтай тэме. «Органы правапарадку павінныя ведаць, што такія ўчынкі ў дачыненні да журналістаў не пройдуць незаўважна», — упэўненая яна.

Закранула старшыня БАЖ і тэму інтэрнет-рэгулявання. Паводле яе словаў, новы прэзідэнцкі ўказ № 60 «Аб захадах па ўдасканаленні выкарыстання нацыянальнага сегмента сеткі Інтэрнет» яшчэ патрабуе вывучэння спецыялістамі. Але ўжо сёння некаторыя пункты яго падаюцца надзвычай трывожнымі — напрыклад, пункт 13 пра магчымасць цэнтралізаванага абмежавання доступу да рэсурсаў з «незаконным» кантэнтам.

«На жаль, наша дзяржава не ўмее апераваць тонкімі рэгулятарамі. Мне падаецца, як толькі будзе распрацаваны механізм абмежавання доступу, тут жа можа пачацца барацьба з інфармацыяй, якая не падабаецца. Мы ўжо маем за плячамі досвед грубага прымянення закона „Аб супрацьдзеянні экстрэмізму“, калі спецслужбы разглядалі ў якасці экстрэмісцкіх матэрыялаў музычныя дыскі, кнігі і нават зарэгістраваны часопіс „Arche“…Усё гэта выклікае асаблівую занепакоенасць у звязку з набліжэннем выбараў», — падкрэсліла Жанна Літвіна.

Каментары