А тым часам у рэгіёнах…

Служба маніторынгу ГА «Беларуская асацыяцыя журналістаў»

Гомель

Газета «Гомельские ведомости» (заснавальнікі — гарвыканкам і гарадскі савет дэпутатаў) са студзеня 2010 года пачала выходзіць накладам 12047 асобнікаў у аўторак і суботу і 15102 — у чацвер. Наклад гэтай газеты да 31 снежня 2009 года быў адпаведна 4050 асобнікаў у аўторак і суботу і 7103 асобнікаў — у чацвер.

Карэспандэнт службы маніторынгу ГА «БАЖ» патэлефанаваў у рэдакцыю «Гомельских ведомостей», каб даведацца, якім чынам удалося так імкліва падвысіць наклад. Намесніца галоўнага рэдактара Наталля Лутчанка паведаміла наступнае: «Новы мэр нашага горада Віктар Піліпец (прыйшоў на пасаду старшыні Гомельскага гарвыканкама з пасады памочніка прэзідэнта па Віцебскай вобласці ў кастрычніку 2009 года) быў вельмі здзіўлены нашым маленькім накладам. Таму мы ўдзельнічалі ў розных выставах. Напрыклад, тых, якія ладзіла гандлёва-прамысловая палата, дзе збіралася вялікая колькасць кіраўнікоў прадпрыемстваў, арганізацый, прадпрымальнікаў. Распавядалі пра газету, пра магчымасці, якія яна дае ўсім ахвочым супрацоўнічаць з ёю, друкавацца ў ёй. Запрашалі паштальёнаў. Так што была магчымасць там жа адразу аформіць падпіску».

Намесніца рэдактара паведаміла таксама, што рэдакцыя атрымлівае часопіс ГА «Беларуская асацыяцыі журналістаў» — «Абажур». Журналісты «Гомельских ведомостей», па яе словах, высока ацэньваюць гэтае выданне.

Брэст

Упраўленне ідэялагічнай работы Брэсцкага аблвыканкама звярнулася да рэдакцый друкаваных і электронных СМІ рэгіёна, каб тыя выказалі свае прапановы наконт намінантаў штогадовага творчага конкурсу, абвешчанага мясцовымі ўладамі.

Зварот тычыцца рэдакцый як дзяржаўных, так і недзяржаўных сродкаў масавай інфармацыі, што працуюць у рэгіёне. Усяго падчас творчага конкурсу плануецца назваць імёны пераможцаў у 13-ці персанальных намінацыях, а таксама вызначыць лепшую раённую і гарадскую газету, рэдакцыю тэлебачання і радыё.

Падвядзенне вынікаў конкурсу павінна адбыцца 19 лютага на сустрэчы старшыні аблвывканкама Канстанціна Сумара з журналістамі мясцовых СМІ.

Варта нагадаць, што па выніках аналагічнага конкурсу ў мінулым годзе лепшым фотакарэспандэнтам быў прызнаны сябра БАЖ, супрацоўнік незалежнай газеты «Брестский курьер» Юрый Макарчук.

На фота: Ю. Макарчук, 2009 год

Лунінец (Брэсцкая вобласць)

Рэдакцыя недзяржаўнай газеты «Информ-прогулка» ўпершыню выставіла сваю каманду для ўдзелу ў традыцыйным раённым турніры па міні-футболе на Кубак памяці воінаў-інтэрнацыяналістаў.

Гульню з камандай Лунінецкага райвыканкама «прагулкаўцы» правялі з лікам 5:5. Да апошняй хвіліны «Информ-прогулка» вяла ў ліку.

Па выніках пяці гульняў каманда «ИП» трымаецца ў сярэдзіне турнірнай табліцы. Як падкрэсліў капітан каманды, старшы аператар газеты «Информ-прогулка» Андрэй Сыцін (са студзеня г.г. — сябра ГА «БАЖ»), гэта выдатна для першага разу, тым больш што астатнія каманды маюць вопыт удзелу ў гульнях падобнага кшталту, а каманда «ИП» сфармавалася літаральна перад турнірам і ўжо здолела атрымаць некалькі перамог і перацягнуць на свой бок шматлікіх заўзятараў.

Фота Андрэя Вышынскага:
капітан каманды Андрэй Сыцін атакуе

Брылі (Магілёўская вобласць)

Вёска Брылі, што ў Магілёўскай вобласці, займела яшчэ адно ўласнае выданне — маланакладную газету «Брылёўскі вернік».

«Мы распачынаем новае выданне, дзе рэлігійная накіраванасць будзе дамінуючай, дзе прадстаўнікі існуючых у нашай мясцовасці канфесій (праваслаўныя і католікі) будуць атрымліваць, спадзяемся, неабходную інфармацыю і знаходзіць адказы на розныя пытанні гісторыі і сучаснасці», — звярнуўся да чытачоў рэдактар і выдавец некалькіх маланакладных газетак у вёсцы Брылі Мікола Яцкоў (ён жа дырэктар мясцовага Цэнтра культуры і адпачынку).

Першы нумар выдання выйшаў накладам 99 асобнікаў на 8-і старонках і рызышоўся па брылёўскіх дварах літаральна за дзень.

«Брылёўскі вернік» стаўся другім мясцовым выданнем, якое мяркуецца выдаваць штомесяц. Гэткую ж перыядычнасць мае выдаваны М. Яцковым інфармацыйны бюлетэнь «Брылёўскі летапіс».