«Занадта смела сябе паводзіў» (АБНОЎЛЕНА, ДАДАЛІСЯ ПАДРАБЯЗНАСЦІ ПРА СУД)

Журналіста Івана Шульгу прызналі вінаватым у дробным хуліганстве (арт. 17. 1 КаАП) і асудзілі на 10 сутак. Суддзя Аксана Рэлява абвесціла прысуд каля 16.30. Пасля гэтага Івана Шульгу зноў павезлі на Акрэсціна.  

Разгляд справы ў раённым судзе Савецкага раёна пачаўся 4 лютага каля 12.30. Першая частка слуханняў прайшла ў закрытым рэжыме - журналісты, што чакалі ў судзе, на некалькі хвілін выйшлі на вуліцу пагутарыць з прадстаўнікамі брытанскай амбасады, якія прыехалі на месца падзей. У гэты час дзверы будынка зачынілі, заявіўшы, што там якраз «пераводзяць правапарушальнікаў».  

Калі дзверы зноў адчынілі, судовую залу ўжо ахоўвалі 2 міліцыянты, якія заявілі, што нікога на слуханні не пусцяць, бо гэта парушыць парадак суда. 

Каля 12.40 карэспандэнт прэс-службы БАЖ перадаў, што ў суд прыехала адвакатка юрыдычнай кансультацыі Савецкага раёна г. Мінска Святлана Гарбаток, якая будзе бараніць інтарэсы журналіста. Яе ў залу суда ўпусцілі.

Пасля 13.00 журналістаў прымусілі пакінуць будынак суда, паколькі ў міліцыянтаў, што ахоўвалі залу, абедзенны перапынак да 14.00. (Міліцыя апасалася, што, пакуль на ўваходзе ніхто не дзяжурыць, журналісты трапяць на слуханні.)

Пасля перапынку траіх журналістаў, у тым ліку карэспандэнта прэс-службы БАЖ, усё ж упусцілі ў залу суда.

Распавядае Яніна Мельнікава: «Як высветлілася пазней, суддзя не была супраць, каб людзі зайшлі: супраць былі міліцыянты ля дзвярэй. Адметна, што дзверы ў судовую залу ахоўвалі тыя самыя прадстаўнікі праваахоўных органаў, якія напярэдадні затрымлівалі Івана Шульгу. Калі мы ўсё ж пасля перапынку трапілі ў залу, сведчанні даваў старшы лейтэнант Каралькоў. Ён заўважна нерваваўся, увесь час перапытваў адвакатку Святлану Гарбаток, не ведаў, як адказваць на яе пытанні…

З яго словаў вынікала, што міліцыя да кватэры па вул. Дарашэвіча пад’ехала з прычыны паступлення скаргаў ад нейкіх людзей — маўляў, у кватэру часцяком носяць вялікія каробкі, і суседзі апасаюцца, ці не скрадзеныя рэчы там захоўваюцца. Сп. Каралькоў сцвярджаў, што Іван Шульга, які выходзіў з кватэры, убачыў міліцыянераў і замест таго каб адказаць на іх пытанні (напрыклад, хто гаспадар кватэры), моўчкі накінуўся на капітана Валынцава.

Сп. Валынцаў выразна кульгаў, а да матэрыялаў справы была прыкладзена даведка пра тое, што ў яго пералом голені і калена, якія нібыта пашкодзіў Іван Шульга. Капітан заявіў, што хлопец падчас бойкі лаяўся, пагражаў  міліцыянтам звальненнямі і сувязямі ў МУС, КДБ і сродках масавай інфармацыі.

Абодва сведкі сцвярджалі, што ніякіх іншых людзей у той момант на пляцоўцы не было. Хоць, па словах Івана Шульгі, акрамя міліцыянтаў там былі людзі ў цывільным, а таксама выходзіў з кватэры сусед, каб глянуць, чаму няма святла (яго адключылі падчас спробаў прарвацца да журалістаў).
Хадайніцтва адвакаткі аб запрашэнні на працэс сведкі-суседа суддзя адхіліла, спаслаўшыся на тое, што нельга сцвярджаць дакладна, у які момант той выйшаў.

Падазрэнні ў нецвярозым стане журналіста не пацвердзіліся, і таму гэта не стала абцяжарвальнай абставінай пры вынясенні прысуду. На пытанне адваката, чаму міліцыянты пры затрыманні вырашылі, што І. Шульга быў нецвярозы, тыя заявілі, што ён «занадта смела сябе паводзіў».

Абвяшчаючы прысуд Івану Шульгу, суддзя Аксана Рэлява запэўніла прысутных, што няма ніякіх доказаў, што міліцыянты агаварылі хлопца, бо ў іх няма матыву гэта рабіць.»

На фота: І. Шульга

Пра тое, што журналіста вязуць у суд, стала вядома толькі каля 11.40 дзякуючы Святлане Гарбаток, якую падключылі сёння да пошукаў журналіста.

Да гэтага часу І. Шульга знаходзіўся ў ізалятары часовага ўтрымання на вул. Акрэсціна ў Мінску.

Сябра ГА «БАЖ» з Оршы Івана Шульгу затрымалі 3 лютага каля дома, у якім здымае кватэру прадстаўнік «Белсата» ў Беларусі Міхась Янчук. Сп. Шульга разам з яшчэ некалькімі незалежнымі журналістамі быў у гэтай кватэры і выйшаў у краму якраз перад пачаткам міліцэйскай «аблогі» (каля. 15.00). Відавочна, убачыўшы каля кватэры міліцыю, Іван пазваніў звонку ў дамафон і папярэдзіў калег пра прысутнасць праваахоўных органаў. Пасля гэтага сувязь з ім абарвалася.

Увечары таго ж дня намеснік начальніка Савецкага РУУС, які прыехаў да кватэры М. Янчука, пацвердзіў факт затрымання І. Шульгі сваімі супрацоўнікамі. Ён паведаміў, што сп. Шульга нібыта аказаў супраціў міліцыянтам і сарваў з аднаго з іх шэўрон, і што яго калегі не выключаюць, што ён быў п’яны.

Усе далейшыя спробы журналістаў высветліць месцазнаходжанне калегі не давалі плёну, пакуль 4 лютага да справы не падключылася адвакатка юрыдычнай кансультацыі Савецкага раёна спн. Гарбаток.

Каментар Андрэя Бастунца, намесніка старшыні БАЖ: «Асуджэнне і затрыманне журналістаў і грамадскіх актывістаў і абвінавачанне іх у парушэнні Кодэкса аб адміністратыўных правапарушэннях — на жаль, звыклая практыка ў Беларусі (гл. спасылкі ніжэй - заўв. рэд.). Такія працэсы не павышаюць даверу ні да міліцыі, ні да судовай сістэмы. Учора, калі мы гутарылі з міліцыянтамі каля кватэры М.Янчука, яны спачатку казалі пра падазрэнні на нецвярозы стан журналіста, потым - пра нібыта сарваны ім з міліцыянта шэўрон (хаця суразмоўцы былі ў цывільным). Сёння ў судзе ўжо фігуравалі довады пра зламаную нагу. Усё гэта выклікае трывогу адносна далейшага развіцця сітуацыі. БАЖ будзе сачыць за лёсам сябра арганізацыі і акзазваць яму неабходную падтрымку.»

Іван Шульга атрымаў першую перадачу

Супрацоўнікі міліцыі спрабавалі ўвайсці ў кватэру, якую здымае прадстаўнік тэлеканала «Белсат»

Журналіста асудзілі на 15 сутак

Сямёна Печанко асудзілі на 15 сутак

Беларуская асацыяцыя журналістаў падрыхтавала спіс журналістаў, якія пацярпелі, былі затрыманыя альбо прыцягнутыя да адміністратыўнай адказнасці з 14 да 27 сакавіка (2006 год)

Каментары