Андрэй Бастунец: «Аператыўна-вышуковая дзейнасць у Інтэрнеце ажыццяўлялася і працягвае ажыццяўляцца…»

«Занепакоенасць выклікае ў першую чаргу пашырэнне кола дзяржаўных органаў, якія могуць ажыццяўляць аператыўна-вышуковую дзейнасць, а значыць, умешвацца ў асабістае жыццё грамадзян, камерцыйную таямніцу арганізацый і г.д.».

Так пракаментаваў намеснік старшыні БАЖ Андрэй Бастунец інфармацыю пра падпісанне 4 студзеня кіраўніком дзяржавы закона «Аб унясенні змяненняў і дапаўненняў у некаторыя законы Рэспублікі Беларусь па пытанні ўзмацнення барацьбы са злачыннасцю». Гэтая навіна асабліва ўзрушыла беларускую інтэрнет-супольнасць, якая расцаніла яе як прыкмету ўвядзення жорсткага кантролю над дзейнасцю грамадзян краіны ў Сеціве.

Закон набыў сілу праз 10 дзён пасля падпісання — гэта значыць, 14 студзеня.

Сярод нарматыўных актаў, у якія ўнесены змены, ёсць і закон «Аб аператыўна-вышуковай дзейнасці», які, ў прыватнасці, падае спіс дзяржаўных органаў, што маюць права ажыцяўляць аператыўна-вышуковую дзейнасць (арт.7). Паводле новага закона, цяпер пералік гэтых органаў (сярод якіх былі органы ўнутраных спраў, органы дзяржбяспекі, мытныя органы і інш.) папоўніўся «Аператыўна-аналітычным цэнтрам пры Прэзідэнце РБ» (п. 4.1 ч. 1 арт. 7).

Паводле таго ж закона, цяпер ААЦ атрымлівае права, сярод іншага, на «слыхавы кантроль», «кантроль паштовых адпраўленняў тэлеграфных і іншых паведамленняў», «зняцце інфармацыі з тэхнічных каналаў сувязі» і іншае (арт. 11).

«Аператыўна-вышуковая дзейнасць у Інтэрнеце ажыццяўлялася і працягвае ажыццяўляцца іншымі органамі. Проста зараз гэтым зоймецца яшчэ спецыялізаваны цэнтр пры прэзідэнце. Які, дарэчы, першапачаткова ствараўся з іншымі мэтамі і валодаў іншымі паўнамоцтвамі», — дадае Андрэй Бастунец.

ААЦ — гэта правапераемнік Дзяржаўнага цэнтра бяспекі інфармацыі пры прэзідэнце РБ (ДЦБІ). (Перайменаванне выканана ў адпаведнасці з указам прэзідэнта N229 ад 21 красавіка 2008 г.). ДЦБІ выконваў шэраг задач, звязаных з забеспячэннем інфармацыйнай бяспекі дзяржавы, тэхнічнай абаронай інфармацыі Прэзідэнта РБ і г.д., быў адміністратарам дамена BY.

«ААЦ нядаўна прыцягнуў увагу да сябе, дзякуючы праекту ўказа аб рэгуляванні Інтэрнету ў Беларусі. Праект выклікаў шырокі розгалас ў беларускай інтэрнет-супольнасці. Новы ўказ надаваў гэтай структуры права кантраляваць каналы доступу да сусветнага павуціння з Беларусі і ўвесь беларускі сегмент Сеціва», — нагадвае nn.by. 

«Дзяржбюджэтам на дзейнасць Цэнтра ў 2010 годзе прадугледжаны аб’ём фінансавання ў памеры 12.540.583,0 тыс. беларускіх рублёў», — паведамляе Electroname.com

Каментары