«Эпідэміі і СМІ — погляд з абодвух бакоў барыкад» (АБНОЎЛЕНА, ВІДЭА)

Беларускія эпідэміёлагі не выключаюць новага росту захворвальнасці на грып у студзені-лютым будучага года. Гэта значыць, што беларускім сродкам масавай інфармацыі, хутчэй за ўсё, зноў давядзецца вяртацца да гэтай набалелай тэмы.

Між тым, асвятленне праблемы захворвання на грып А (H1N1) у СМІ «цягне» на асобную размову. Прынамсі, так палічылі арганізатары «круглага стала», які адбыўся 16 снежня ў мінскай арт-галерэі «Ў».

Ініцыятарам сустрэчы медыкаў з журналістамі выступіў адзін са стваральнікаў «сайта неабыякавых медработнікаў» Doktar.by, лекар-рэаніматолаг Андрэй Вітушка.

Журналістаў сабралася каля дзесятка. Столькі ж удзельнікаў мела быць і з «медыцынскага» боку, але на «круглы стол» прыйшлі толькі двое — уласна Андрэй Вітушка і асістэнт кафедры інфекцыйных хвароб Беларускай медыцынскай акадэміі паслядыпломнай адукацыі Мікалай Шаўлоў (дарэчы, аўтар адкрытага ліста, апублікаванага ў «Народнай волі»).

Абодва маюць прэтэнзіі да таго, як асвятлялі беларускія СМІ тэму грыпу. Паводле медыкаў, на кантакт з імі выходзілі лічаныя прадстаўнікі СМІ, у той час як у прэсе з’яўляліся перадрукі з блогаў «ананімных спецыялістаў». І нават у інтэрв’ю з дактарамі журналісты, маўляў, змяшчалі акцэнты і згушчалі фарбы. Як прызнаўся М. Шаўлоў, ён «не бачыў ніводнага аб’ектыўнага матэрыялу» на тэму грыпу.

Відавочна, гэта даволі распаўсюджаны сярод медыкаў погляд: прынамсі, гэткія ж заўвагі выказвае і лекар-блогер, супрацоўнік «Хуткай дапамогі» Канстанцін Талстаногаў, чый допіс арганізатары «круглага стала» распаўсюдзілі сярод журналістаў: «Залішняя палітызацыя сюжэтаў, звязаных з эпідэміяй. Любая здабытая і вырваная з кантэксту інфармацыя падавалася пад соўсам «да чаго рэжым краіну давёў» і «шанцаў выжыць хвораму ў нашай краіне няшмат… Незалежным СМІ гэтак жа, як і афіцыйным уладам, не ўдалося запоўніць пустую нішу асветніцкай дзейнасці.»

Для журналістаў было нечаканасцю, што нават гатовыя да кантактаў з прэсай медыкі бачаць сябе па іншы бок «барыкад». Прадстаўнікі СМІ даводзілі, наколькі складана было выцягнуць з-за маўклівага «муру», узведзенага Міністэрствам аховы здароўя, хоць якія аскепкі інфармацыі — асабліва статыстыку, на якой базуецца любая аналітыка. Журналістам давялося тлумачыць, чаму для напісання паведамлення патрэбна інфармацыйная нагода, а таксама пераконваць, што яны зусім не супраць узгадняць гатовыя тэксты з героямі сваіх матэрыялаў, каб пазбегнуць скажэння фактаў.

Удзельнікі «круглага стала» пагадзіліся, што журналістам і медыкам — тым, хто шукае інфармацыю і тым, хто гатовы яе прадаставіць, — перашкаджае паразумецца недахоп камунікацыі. Таму Андрэю Вітушку прапанавалі ўзяць на сябе ролю мадэратара гэтых кантактаў, калі зноў узнікне такая неабходнасць.  

Каментары