Прэс-служба ГА «Беларуская асацыяцыя журналістаў»
Вэб-старонка «Рэгіянальнай газеты», новая версія якой стартавала ўлетку гэтага года, перамагла ў конкурсе «Найлепшы рэдызайн Інтэрнет-сайта», абвешчаным шведскім інстытутам FOJO.
Конкурс сайтаў праводзіўся паралельна з адукацыйным праектам, які ладзіў інстытут FOJO ў 2009 годзе для беларускіх вэб-журналістаў, вэб-дызайнераў і вэб-менеджэраў. У конкурсе ўдзельнічалі толькі online-версіі друкаваных выданняў, прадстаўнікі якіх праходзілі навучанне цягам года.
«За значны прагрэс на працягу года, што прывёў да стварэння вельмі прывабнага і добра збалансаванага інтэрнет-сайта з выразнай вёрсткай, прыемнай каляровай гамай, добрай якасцю шрыфту і лёгкім для ўспрымання зместам. Сярод іншага мы хацелі б адзначыць выдатную якасць фотаздымкаў і вельмі сур’ёзны падыход да адбору ілюстрацый», — гаворыцца ў адмысловым дыпломе, які падпісалі дырэктарка FOJO Анэлі Эверс і кіраўніца міжнародных праектаў Агнэта Содэрберг Якабсан.
Скрыншот сайта "РГ"
«Інтэрнет-сайт „Рэгіянальнай газеты“ мае некалькі добрых рысаў. Навігацыя па сайце добра структураваная. Аднак навігатары не перахопліваюць асноўную ўвагу чытача. Першае, што чапляе погляд, — гэта змест, а навігатары падтрымліваюць яго, — пералічваюць крытэры сваёй ацэнкі шведскія эксперты. — Рататар навінаў на галоўнай старонцы, які анансуе галоўныя матэрыялы, з’яўляецца добрым прыкладам прывабнай і змястоўнай прылады навігацыі…»
Вынікі конкурсу кіраўніцтва ГА «Беларуская асацыяцыя журналістаў» абвясціла на нарадзе рэдактараў друкаваных і электронных СМІ, якая адбылася ў БАЖ 10 снежня. Калегі шчыра павіншавалі «Рэгіянальную газету» з заслужанай перамогай.
