Прадстаўнікі БАЖ бяруць удзел у кангрэсе Асацыяцыі еўрапейскіх журналістаў

Група беларускіх журналістаў знаходзіцца ў Маастрыхце (Галандыя), дзе бярэ ўдзел у Кангрэсе Асацыяцыі еўрапейскіх журналістаў (AEJ).

У складзе групы — прадстаўнікі ГА «Беларуская асацыяцыя журналістаў», а таксама пераможцы журналісцкага конкурсу па асвятленні праблем мясцовага самакіравання ў Беларусі. 

Кангрэс праходзіць 20–21 лістапада. У праграме саміту — дыскусія па пытаннях свабоды сродкаў масавай інфармацыі ў Еўропе, у межах якой пройдзе прэзентацыя становішча са свабодай СМІ і свабодай выказвання ў Беларусі.

«Для беларускіх журналістаў вельмі важна пачувацца часткай еўрапейскай медыя-супольнасці, — адзначае намеснік старшыні ГА „Беларуская асацыяцыя журналістаў“ Андрэй Аляксандраў. — Мы бачым цікавасць да сітуацыі ў Беларусі з боку нашых калег з іншых краін Еўропы, а таксама гатовасць да супрацоўніцтва з беларускімі журналістамі і медыя-арганізацыямі».

Па выніках кангрэсу можа быць разгледжана пытанне аб наданні ГА «БАЖ» статусу назіральніка пры Асацыяцыі еўрапейскіх журналістаў.

Асацыяцыя еўрапейскіх журналістаў была створана ў 1961 годзе. У яе склад уваходзяць журналісты, аб’яднаныя ў нацыянальныя секцыі, створаныя ў больш як 20 краінах-сябрах Рады Еўропы.

Каментары