БАЖ рэкамендуе кандыдатамі на прэмію Фонда Цайт Марыну Коктыш і «Информ-прогулку» (АБНОЎЛЕНА)

Такое рашэнне прыняла Рада арганізацыі 24 верасня.

З 25 жніўня ГА «БАЖ» абвясціла прыём заявак ад СМІ і журналістаў, якія жадаюць паўдзельнічаць у конкурсе на атрыманне прэміі імя Герда Буцэрыуса і адпавядаюць умовам Фонда Цайт. Паколькі самавылучэнне на конкурс немагчыма, арганізацыя прапанавала ахвотным звярнуцца да яе па рэкамендацыю.

За гэты час у БАЖ прыйшлі заяўкі ад рэгіянальнай газеты «Борисовские новости», лунінецкай «Информ-прогулки» і рэгіянальнага інтэрнет-рэсурсу «Борисов электронный». Персанальная заяўка паступіла ад Марыны Коктыш («Народная воля»).

Ліст у падтрымку «Борисовских новостей» даслала Асацыяцыя выдаўцоў рэгіянальнай прэсы «Аб’яднаныя масмедыі». Марыну Коктыш падтрымаў адмысловым зваротам да Рады галоўны рэдактар «Народнай волі» Іосіф Сярэдзіч.

Пасля кароткіх прэзентацый прадстаўнікоў рэдакцый і выказванняў «за» і «супраць» названых кандыдатаў адбылося закрытае галасаванне.
Па яго выніках сярод рэдакцый перамагла «Информ-прогулка».

Большасцю галасоў Рада падтрымала таксама вылучэнне кандыдаткай на прэмію Марыны Коктыш.

М. Коктыш

«Рада БАЖ мае права рэкамендаваць Фонд ўзнагародзіць нашых кандыдатаў, але гэта не гарантуе, што наша рашэнне ўлічаць», — нагадала намесніца старшыні БАЖ Аліна Суравец.

Акрамя вылучэння на прэмію «Цайт», Рада разгледзела яшчэ некалькі пытанняў. Жанна Літвіна выступіла з кароткім аглядам самых значных падзей у жыцці прафесійнай супольнасці за апошні час. У прыватнасці, яна коратка распавяла пра візіт міжнароднай журналісцкай місіі, што працавала ў Мінску з 21 па 23 верасня.

Асобна старшыня БАЖ спынілася на падзеях 16 верасня, калі журналісты сутыкнуліся з грубымі перашкодамі ў працы з боку праваахоўных органаў.

«Гэтыя падзеі нас вельмі ўзрушылі, бо наперадзе ў нас - мясцовыя і прэзідэнцкія выбары. Калі мы не праявім грамадзянскую пазіцыю зараз, такое стаўленне да нас можа ператварыцца ў сістэму», - падкрэсліла яна.

Старшыня Камісіі па этыцы БАЖ Анатоль Гуляеў прэзентаваў Радзе праект новага Палажэння аб Камісіі, распрацаванага замест мінулага, састарэлага. Па словах сп-ра Гуляева, дакумент рыхтаваўся на падставе аналагічных дакументаў, якімі карыстаецца журналісцкая супольнасць Польшчы, Літвы, Скандынавіі, Расіі. «Мы вельмі не хочам, каб наша Камісія ператваралася ў журналісцкую інквізіцыю, і гэтым падыходам кіраваліся», - падкрэсліў Анатоль Гуляеў.

Сябры Рады прагаласавалі за тое, каб зацвердзіць Палажэнне. (ЦАЛКАМ ПРАЕКТ ДАКУМЕНТА МОЖНА ПРАЧЫТАЦЬ ТУТ).

Каментары