Журналістам груба перашкаджалі выконваць прафесійныя абавязкі
Журналістам беларускіх і замежных СМІ не давалі здымаць падзеі на Кастрычніцкай плошчы Мінска ўвечары 16 верасня, дзе адбывалася акцыя памяці зніклых 10 гадоў таму палітыка Віктара Ганчара і бізнесоўца Анатоля Красоўскага.
На кожнага журналіста даводзілася па 2 чалавекі ў цывільным, якія захіналі іх відэа- і фотакамеры, адштурхоўвалі ад дэманстрантаў, нягледзячы на наяўнасць у журналістаў рэдакцыйных пасведчанняў.
Фота Я. Мельнікавай
Фота Я. Мельнікавай
Каля 18.00 некалькі дзесяткаў чалавек сталі ўздоўж праспекта Незалежнасці на Кастрычніцкай плошчы з партрэтамі зніклых і расцяжкай “Мы помнім”.
Іх адразу ж блакавалі супрацоўнікі АМАП, адгарадзіўшы ад праезджай часткі праспекта. (Паводле ацэнак відавочцаў, колькасць міліцыі больш як удвая перавышала колькасць удзельнікаў акцыі). Адначасова на плошчу прыбегла група людзей у цывільным, якія “заняліся” журналістамі, перашкаджаючы ім здымаць.
Затым падагналі некалькі міліцэйскіх аўтобусаў, куды пасля сілавога затрымання загналі ўсіх удзельнікаў акцыі і адвезлі ў РУУС Цэнтральнага раёна сталіцы. (Каля 21.30 усіх затрыманых адпусцілі без складання пратаколаў).
Агулам акцыя доўжылася не больш за 10 хвілін.
«Гэта вельмі грубы жэст з боку ўладаў і трывожны знак для прэсы, — пракаментавала падзеі 16 верасня старшыня ГА «БАЖ» Жанна Літвіна. — Недапушчальна і непрымальна парушаць гарантаванае законам прафесійнае права журналістаў на атрыманне і распаўсюд інфармацыі».
Нагадаем, што п. 2.2 арт. 34 дзейнага закона «Аб СМІ» («Статус журналіста сродку масавай інфармацыі») дазваляе яму «прысутнічаць у раёнах узброеных канфліктаў альбо надзвычайных сітуацый, на масавых мерапрыемствах, у месцах іншых грамадска важных падзей і перадаваць адтуль інфармацыю».
