«Рэгіянальная газета» запусціла новы сайт
Днямі стартавала новая версія вэб-сайта «Рэгіянальнай газеты», якая выходзіць у Маладзечна.
Над інтэрнет-версіяй выдання зараз працуюць усяго 3 чалавекі. «Мы хочам узяць за правіла – спачатку пісаць для сайта, а ўжо потым абслугоўваць папяровую версію», — кажа галоўны рэдактар выдання Аляксандр Манцэвіч.
Сайт не з'яўляецца люстраным адбіткам «папяровай версіі», хаця пакуль іх кантэнт, паводле рэдактара, супадае на 80%. З цягам часу супадзенняў будзе ўсё менш, спадзяецца ён: «Пры тыднёвым рытме жыцця “Рэгіянальнай газеты” мы будзем напаўняць сайт навінамі штодня».
Па словах А. Мацэвіча, Інтэрнет дазваляе наладзіць паўнавартасную зваротную сувязь з чытачом. І аўдыторыя сайта значна больш актыўная, чым аўдыторыя газеты – людзі ахвотна каментуюць паведамленні, даюць парады і г.д.
«Мы не баімся, што наш інтэрнет-сайт з цягам часу выцесніць папяровую “Рэгіянальную газету”, — упэўнены А. Манцэвіч. — Мы бачым сваю будучыню ў сімбіёзе дзвюх версій выдання».
