Збіты журналіст часопіса «Taboo» Эдвард Тарлецкі
Днямі ў Мінску быў моцна збіты аўтар часопіса «Taboo», сябра БАЖ Эдвард Тарлецкі. Як паведаміў у гутарцы з прэс-службай БАЖ сп. Тарлецкі, гэта здарылася позна ўвечары 21 траўня каля яго дома. Па словах журналіста, на яго напалі трое незнаёмых маладых мужчын.
На фота: Э. Тарлецкі пасля нападу
«Я вяртаўся дахаты прыкладна ў 23 гадзіны вечара, гэтыя хлопцы стаялі каля пад’езда. Адзін з іх назваў маё прозвішча. Калі я адазваўся, адзін з іх нечакана ўдарыў мяне моцна ў твар. Я паваліўся, і тады яны пачалі біць мяне нагамі, пераважна па галаве. У выніку я страціў прытомнасць», — распавёў пра здарэнне Э. Тарлецкі. Паводле яго слоў, ачуняць і дайсці да кватэры яму дапамагла суседка.
Ніякіх меркаванняў і здагадак, хто і з якой прычыны здзейсніў напад, у журналіста няма. «Дакладна не дзеля таго, каб абрабаваць, бо ні грошай, ні іншых рэчаў з сумкі злачынцы не ўзялі», — зазначыў Тарлецкі.
Звяртацца ў міліцыю збіты журналіст не збіраецца, паколькі лічыць, што гэта будзе толькі «безвынікова згублены час».
