«МедыяБарКэмп» пройдзе ў Літве

Ад 6 да 8 чэрвеня на беразе возера Балтаюрас у Літве пройдзе фестываль новых медыяпраектаў «Мед­ыяБарКэмп», які арганізуе Беларуская партыя «Зялёныя».

Як паведаміў прэс-службе ГА «БАЖ» старшыня БПЗ Алег Новікаў, на фестываль прыедуць людзі з розных краін, якія напрацягу трох дзён будуць абмяркоўваць новыя медыйныя праект­ы і тэхналогіі.

«Гаворка, перш за ўсё, будзе ісці пра новыя медыя, звязаныя з Інтэрнетам — гэта будуць нейкія арт-пректы, праекты кшатлу інтэрнет-радыё і гэтак далей», — зазначыў Алег Новікаў. — «Таксама вельмі цікавы накірунак — гэта блогеры: такім чынам, удзельнікі будуць засвойваць новыя магчымасці працы ў Інтэрнеце. Адзначу, што гэта не партыйнае ці палітычнае мерапрыемства, а менавіта медыйнае».

Арганізатары фестывалю мяркуюць сабраць больш за 200 медыяактывістаў з Беларусі, Літвы, Украіны ды іншых краін. Найперш гэта будуць людзі, што рэалізуюць лакальныя медыяпраекты — стваральнікі блогаў горада або раёна, відэакліпаў, фільмаў, гукавых файлаў у Інтэрнеце — з мэтай прыцягнуць увагу да тых ці іншых сацыяльных праблем.

Усе ўдзельнікі «МедыяБарКэмпа», паводле Алега Новікава, будуць мець магчымасць свабодна абмяняцца думкамі ды ідэямі — мерапрыемства будзе максімальна нефармальным.

Каментары