Сямёна Печанко асудзілі на 15 сутак
Журналіста недзяржаўнай газеты «Наша Ніва» Сямёна Печанко асудзілі на 15 сутак адміністратыўнага арышту. Гэтую інфармацыю пацвердзіла юрыстам БАЖ адвакатка сп-ра Печанко. Андрэя Лянкевіча — другога журналіста газеты, які таксама быў затрыманы ўчора на вулічнай акцыі — судзяць ў Завадскім райсудзе. Абодвух абвінавачваюць паводле арт. 23.34 КаАП - парушэнне парадку арганізацыі і правядзення масавых мерапрыемстваў.
Сямён Печанко (злева) і Андрэй Лянкевіч (справа) - фота "НН")
Як паведамляе «Наша Ніва», сведкамі па адміністратыўнай справе С. Печанко выступілі супрацоўнікі міліцыі Зароўскі і Запечанко. Яны сцвярджалі, што журналіст падчас затрымання выкрыкваў «Ганьба» і «Жыве Беларусь». Па словах аднаго з міліцыянтаў, у Сямёна пры сабе быў сцяг.
Пазаштатнага фотакарэспандэнта «Нашай Нівы» Андрэя Лянкевіча, хутчэй за ўсё, будуць судзіць у Завадскім судзе Мінска. Як паведаміла праваабаронца Таццяна Равяка, сёння яна бачыла журналіста ў будынку гэтага суда, хаця вядома, што пасля затрымання А. Лянкевіча даставілі ў Савецкі РУУС горада.
Нагадаем, журналісты былі затрыманыя падчас выканання прафесійных абавязкаў на мірнай вулічнай акцыі. Пры сабе яна мелі рэдакцыйныя пасведчанні. Па словах калег, А. Лянкевічу ў момант затрымання да крыві разбілі твар.
